شريف مدكور.. كل هذا الحب والاحترام من الجمهور

مظاهرة حب حقيقية سترصدها حينما تقرأ تعليقات الجمهور على البوست الذي كتبه شريف مدكور، وقال فيه: «إيه كل الحب ده.. حب الناس و كلامهم نساني تعب المرض نعمه و فضل»، فتقول إحداهم: «بص ياشريف.. إنت حد جواك طيب، وبتعمل خير وتجبر بخاطر ناس كتير.. ربنا حيوقفلك الخير ده، وحيجبر بخاطرك أنا متأكدة». 

وقالت أخرى: «يلا شد حيلك، إنت سبب نجاحى ووقفتى وسندى ومثلي الأعلى ومعلمى وأخويا وكل حاجة حلوة حصلتلي في حياتي، ربنا معاك وهيحفظك لأنك إنسان طيب وكريم ومحترم ومساعد من كل قلبك للناس بتفانى وحب، وإنت كل حاجة حلوة تتقال عليك بصراحة، هتقوم بألف سلامة بحق الأيام المفترجة بإذن الله، اللهم أشفيك شفاء لا يغادر سقما».

وفيما داعبه آخر قائلًا: «يا عم متقعدش تقلقنا وتخوفنا و تخلي الواحد مش عارف يعمل إيه عشان يجيلك و لا يسيبك ترتاح َ ولا إيه بس.. كلنا بنحبك يا أحلى شريف في الشارع كله مش بس نمرة 4».

هذا الحب كله لم يأت من فراغ كما تقول إحدى متابعي شريف، حيث كتبت: «ديه دعوة الوالدة أكيد وتربيتها ليك على التواضع، وحب الناس محبب فيك خلقه، يا رب يشفيك ويعافيك وتقوم لنا بألف سلامة، ولا يورينا مكروه فيك أبدا بحق الأيام المفترجة، وربنا عالم بقلبي، يا رب أشفي شريف يا رب».

الكل اتفق في التعليقات على طيبة قلب شريف وحبه الخير للناس، وهذا ما سيشفع له في مرضه، كما قال أحدهم، الذي دعا له قائلًا: «بإذن الله هتقوم بألف سلامة قريبا، وربنا هيكرمك احسن كرم يا احلي و اجدع شريف في الدنيا»، وبالمثل كتبت أخر: «ربنا يشفيك يا أحلى وأنضف وأنقى إنسان أنا عرفته في حياتي، يا شريف إنت عارف غلوتك عندي وعند الناس أكيد، وكلنا على يقين أن ربنا هيعديها على خير إن شاء الله».

مئات الدعوات انهالت على بوست شريف فتقول إحداهن: «طبعا بنحبك وبندعيلك تقوم بالسلامة، إن شاء الله ربنا يشفيك ويعافيك وتقوم بالسلامة إن شاء الله، بس طمنا عامل إيه دلوقتي». (اقرأ أيضًا.. شريف مدكور يعلن إصابته بورم في القولون)

الفنانون كانوا حاضرين أيضًا بقوة، وحرصوا على مؤازرة الإعلامي، بتعليقاتهم على صفحته الرسمية بموقع «فيسبوك»، حيث كتبت نشوى مصطفى: «يا شريف أنا باحبك أوى، أنا وكل الناس اللي أعرفهم، أمى لما عرفت إنك تعبان قعدت تدعيلك كتير أوى، وبتقول لك هتخف وتبقى زي الفل بإذن الله».

بدرية طلبة كتبت: «ربنا يتم شفاك على خير وتقوم لحبايبك وأهلك وأصحابك وشغلك بالسلامة يا غالي يا محترم»، وعلق المطرب أمير صلاح الدين قائلا: «ألف سلامة عليك يا أستاذ شريف يا منعش المذيعين».

فيما عقبت الفنانة عبير صبري: «ألف سلامة عليك وربنا يشفيك ويعافيك وكل الناس بتحبك»، ونسمة محجوب قالت: «سلامتك وحمدالله هالسلامة»، وداعبته الفنانة أنوشكا: «آديك عرفت بنحبك قد إيه، خلاص يا سيدى؛ أقولها تانى؟ بنحبك».
وشاركت منة فضالي صورة شريف عبر حسابها على «انستجرام»، وكتبت: «شريف من الناس المحترمة، اللي تبقي فخور بيها، وكفايه إن قلبه أبيض ومتصالح مع نفسه، سلامتك مليون سلامه شيشو القمر، تقوم بسلامة يا رب يا غالي».